2013年7月13日 星期六

賴死唔走 你冇得救

兩年前第一篇〈周日趣BlogBlog〉,題目為「跌一成唔止蝕有排輸」,上周見到熔盛(1101)股價跌足九成,有感而發。股價蒸發九成,對三四線股而言並非奇事,但市值曾經超過500億元、且是內地造船廠一哥的熔盛,居然「溶剩」,感覺非常心寒。
熔盛2009年10月上市,股榮統計其上市至今,外資大行、財演及學者的推薦文章,合共有140餘篇,建議買入撈底的佔九成(130篇)以上,字眼不外乎「實力民企、嚴重超賣、5蚊有支持、執平股」等,結果是越跌越傷心。反而建議沽貨止蝕的,只有五篇,其他則叫人觀望靠邊站。

300隻新股 190隻要輸錢

在此並非要歸咎責任,事關每個人都有心魔,認定買股票只要同佢鬥長命,總有返家鄉的一日,以為跌得多就係抵、超賣後就可以反彈,結果越輸越跌、卻越唔捨得走,埋下慘敗的伏線。
翻查2008年至今共近300隻主板上市股份,下跌股份達190隻,上升股份則有106隻,換言之,買新股輸錢機會接近三分之二,而且無論大、中、小新股,一樣可以輸到仆直。熔盛當年集資逾百億元,同樣籌逾百億難返家鄉的還有恒盛(845)、俄鋁(486)、忠旺(1333)及中聯重科(1157)等。二三線新股一樣可以輸到見骨,上市迄今市值唔見八成的有超過十隻,包括曾熱炒的永暉(1733)及霸王(1338)。股價跌五成或以上的更有83隻,佔整體近三成。
2009年至2011年,香港連續三年成為全球新股集資王,諷刺地,過去兩三年出現問題並長期停牌的新股,就是在這段時間蜂擁而至,任意放行、沒有嚴謹職前審查,令一個又一個的炸彈逐漸引爆。這個新股王美譽,不要也罷。
曾淵滄教授上周曾講過,「選錯股雖然不可避免,但冇所謂,只要能選中一隻升值10倍的股,就足以抵銷九隻大跌99%的損失」。
2008年至今,表現最好的新股是華熙生物科技(983),當年集資不足1億元,迄今累升8.4倍。理論上,教授說的話沒錯,只是執行上說易行難,能夠忍足一倍才食糊的已經鳳毛麟角,更何況要等足十倍。
止賺不止蝕是散戶的通病,要成為一個成功的投資者,肯認輸是第一步,賴死唔走,到最後只會不斷悔疚。

股榮

沒有留言:

張貼留言